Туркиянинг «Haberturk» нашри Ўзбекистоннинг коронавирусга қарши курашдаги фаолиятини юқори баҳолади

Туркиянинг «Haberturk» нашри Ўзбекистоннинг коронавирус пандемиясига қарши қўллаган амалий чораларини таҳлил қилди.

Унда мамлакатнинг қўлга киритган ютуқлари минтақада бошқа давлатларникидан ажралиб туриши, касаллик ва ўлим ҳолатлари камлиги, соғаяётганлар сони ошиб бораётганлиги ва бунга ўз вақтида кўрилган чоралар сабаб бўлганини айтиб, Ўзбекистон бошқа мамлакатларга намуна сифатида кўрсатилган.

Мақолада Ўзбекистон мамлакатга эпидемия кириб келганида бошқа мамлакатлардан фарқли равишда Наврўз ва шу каби бошқа оммавий маросимларни ва мактаблар фаолиятини тўхтатгани қайд этилган. Шунингдек, халқаро авиақатновларни ва темир йўллар қатнови тўхтатилгани, Президент Шавкат Мирзиёев эпидемия бошланиши билан фуқароларнинг яшаш шароитларини яхшилаш ва иқтисодий барқарорликни таъминлашга қаратилган жами 14 банддан иборат қарорни имзолагани таъкидланган.

«Haberturk» Ўзбекистоннинг соғлиқни сақлаш тизимига, тиббиёт ходимларига, тиббий ҳимоя воситалари ва асбоб-ускуналар сотиб олишга катта маблағ ажратганини алоҳида таъкидлаган.

Нашр, шунингдек, Ўзбекистондаги ички ва ташқи иқтисодий сиёсатига ҳам тўхталиб, сиёсатшунослар Ўзбекистоннинг ривожланаётгани ва ташқи сиёсий ютуқлари ҳақида илиқ фикр билдирганини маълум қилган. Шу ўринда, иқтисодий ривожланган давлат бўлган АҚШ Ўзбекистон билан ҳамкорлик қилаётган давлатлар орасида биринчи ўринда туришини ҳам келтирган ҳамда 2019 йилда икки мамлакат ўртасидаги савдо ҳажми 2018 йилга нисбатан 44 фоизга, импорт ҳажми эса 49,9 фоизга ўсганини айтган.

Аввалроқ Наманганга коронавирусга қарши курашишда кўмаклашиш учун туркиялик шифокорлар келгани, Туркия ва Италия компаниялари Ўзбекистонга инсонпарварлик юкларини жўнатгани хабар қилинган эди.