Ўзбекистон пандемия давридa хориждан қанча фуқаросини қайтаргани маълум бўлди
Ўзбекистон пандемия даврида 500 мингдан ортиқ фуқаросини ортга қайтарди. Бу ҳақда Шавкат Мирзиёев Конституциянинг 28 йиллиги муносабати билан Ўзбекистон халқига йўллаган байрам табригида айтилди.
Фото: Транспорт вазирлиги ахборот хизмати
Табрик давомида Президент пандемия бошланганидан бери мамлакат расмийлари чет элда бўлган ўзбекистонлик фуқароларнинг муаммоларини зудлик билан ҳал қилиш чораларини кўрганлигини таъкидлаган.
«Хорижий мамлакатлардаги фуқароларимизнинг мавжуд муаммоларини тезкор ва ижобий ҳал этиш, уларга амалий ҳуқуқий ёрдам кўрсатиш ҳамда Ватанимизга қайтариш борасида бу йил аниқ чора-тадбирлар амалга оширилгани халқимизга яхши маълум. Хусусан, пандемия даврида 500 мингдан зиёд Ўзбекистон фуқароси юртимизга олиб келинди. Чет элларда қийин аҳволга тушиб қолган 100 мингга яқин юртдошимизга турли ёрдамлар кўрсатилди», — деди Президент.
Аввалроқ Абхазиядан 300 га яқин ўзбекистонлик махсус чартер рейси орқали олиб келингани ҳақида хабар берилганди. Шунингдек, Москвадан 442 нафар ўзбекистонлик чартер рейс орқали ватанга қайтарилгани ҳамда Россиядан 1000 нафарга яқин ўзбекистонлик олиб келингани ҳақида хабар берилган.
