Қоракўл Халқаро математика мактаби ўқувчилари Жанубий-Шарқий Осиё олимпиадасида 2 та олтин медални қўлга киритди

Бухоро вилояти Қоракўл Халқаро математика мактаби ўқувчилари Жанубий-Шарқий Осиё математика олимпиадаси (SEAMO-2020) совриндорларига айланди. Бу ҳақда туман ҳокимлиги ахборот хизмати «Tez News»га хабар берди.

Фото: Қоракўл туман ҳокимлиги ахборот хизмати

Хабарга кўра, 2020 йилнинг 4 октябрь кунида Бухоро шахрида ўтказилган олимпиаданинг худудий босқичида 11 нафар ўқувчилари иштирок этган. SEAMO-2020 натижасига кўра, мактабнинг жами иштирок этган 11 нафар ўқувчисидан 2 та олтин, 1 та кумуш ва 4 бронза медални қўлга киритган.

Таъкидланишича, ушбу мусобақада иштирок этган 8 ва 9-синф ўқувчилари Асилбек Абдуқаюмов, Анваржон Рахматов олтин медални қўлга киритиб мусобоқанинг халқаро босқичидаги иштирокини давом эттиради.

Шунингдек, мактабнинг 9-синф ўқувчилари Отабек Жўрабеков ва Муҳаммадали Равшановлар бронза медални қўлга киритган. Мактабнинг 10-синф ўқувчиларидан Жасур Рўзибоев кумуш медални ҳамда шу синфнинг ўқувчилари Лазизбек Ражаббоев ва Азизбек Эргашовлар бронза медални қўлга киритган.

Эслатиб ўтамиз, 2020 йилнинг 18-19 январь кунлари мазкур олимпиаданинг Австралия давлати Голд-Кост шаҳрида математика фанидан бўлиб ўтган халқаро финал босқичида Олтин медални Қоракўл Халқаро математика мактабининг 8-синф ўқувчиси Бекзоджон Нуриддинов қўлга киритган эди.

Маълумот учун, SEAMO — Сингапур давлатининг Global SEAMO ташкилоти томонидан ўтказилади. Барча тест саволлари эса Сингапур давлатининг Terry Chew академияси томонидан тайёрланади ва тасдиқланади.

Аввалроқ Қоракўл Халқаро математика мактаби тажрибасининг методик қўлланмаси яратилиши, мактаб мутахассислари томонидан сирдарёлик педагогларга маҳорат дарслари ўтилгани хабар қилинган эди.

Мавзуга доир: Қоракўлда Халқаро математика мактабининг барча битирувчилари талабаликка қабул қилинди