Дунё бўйлаб коронавирус билан касалланиш бўйича янги рекорд қайд этилди
Дунё бўйлаб ўтган сутка ичида 628 136 киши коронавирус чалингани аниқланди. Ушбу кўрсаткич пандемия бошидан буён 24 соат ичида аниқланган энг юқори кўрсаткич эканлиги қайд этилган.
Фото: «Axios»
Жаҳон соғлиқни сақлаш ташкилотининг маълум қилишича, ўтган бир суткада энг кўп касалланиш ҳолати АҚШда қайд этилган. Мамлакатда сўнгги 24 соат давомида 142 076 киши COVID-19 инфекциясини юқтириб олган.
Шунингдек, сўнгги бир сутка ичида коронавирус қайд этилган беморларнинг сони бўйича иккинчи ўриннни Бразилия эгаллаган. Жанубий Америка мамлакатида ўтган сутка давомида 48 331 киши коронавирусга чалинган. Рўйхат учлигидан бир суткада 44 879 та касалланиш ҳолати аниқланган Ҳиндистон жой олган.
Дунё бўйлаб коронавирус тарқалиши бўйича вирус «ўчоғи» бўлиб турган АҚШда умумий касалланганлар сони 11 миллион нафардан ошган.
Маълумот ўрнида, «Worldometers»нинг 14 ноябрь, шанба куни Тошкент вақти билан соат 23:30 даги маълумотларига кўра, дунё бўйича коронавирусга чалинганлар сони 54 118 332 кишига етган. Ушбу беморларнинг 37 715 209 нафари соғайган ва 1 314 801 нафари касалликдан вафот этган.
Аввалроқ ЖССТ сўнгги етти кунда COVID-19ʼга чалинган беморлар сони рекорд даражада ўсгани маълум қилган эди. Бундан ташқари, АҚШнинг «Pfizer» компанияси яратган коронавирусга қарши вакцинанинг салбий томони маълум бўлган.
