Ўзбекистонда етиштириладиган техник каннабис инсон организмига қандай таъсир кўрсатиши маълум бўлди
АОКАда 17 декабрь куни бўлиб ўтган брифингда Қишлоқ хўжалиги вазирлиги матбуот котиби Нигора Хўжаева таркибида гиёҳванд восита мавжуд бўлган техник каннабисни иқтисодий мақсадларда етиштириш қанчалик хавфли эканлиги ҳақида маълумот берди.
«Техник каннабис — таркибида 0,2 фоизгача миқдорда тетрагидроканнабинол гиёҳвандлик моддаси мавжуд бўлган ўсимлик. Ховос туманида экилган нав Европадан, яъни Франциядан келтирилган бўлиб, унинг таркибида гиёҳванд жуда кам миқдорни ташкил этади. Бу эса тирик организмга ҳеч қандай наркотик таъсир кўрсатмайди. Шу боисдан Ўзбекистонда етиштириладиган техник каннабис ўсимлигининг таркибидаги моддалар инсон организмига умуман салбий таъсир кўрсатмайди. Ўзбекистонда таркибида 0,2 фоизгача миқдорда тетрагидроканнабинол гиёҳвандлик моддаси мавжуд техник каннабис ўсимлигини саноат мақсадларида етиштиришга рухсат этилди. Жумладан, бу кўрсаткич Хитой ва Чехияда — 0,3 фоизгача, Италия, Венгрия, Швеция, Бельгияда 0,2 фоизгача, Россияда — 0,1 фоизгачани ташкил этади», — дейди Нигора Хўжаева.
Aввалроқ Инновацион ривожланиш вазирлиги каннабис етиштирувчи турк компанияси билан 230 млн долларлик шартнома имзолагани хабар қилинганди. Шунингдек, Ўзбекистонда каннабис етиштириш учун бериладиган лицензия нархи 700 млн сўмлиги маълум қилинган. Кейинроқ Ўзбекистонда каннабис билан шуғулланиш учун лицензия олиш шартлари эълон қилинди.
