Бухорода 13 ёшли қизнинг бошига болға билан уриб, уйдан тақинчоқ ва пул ўғирлаган аёл ушланди
Бухоро шаҳрида 16 ноябрь куни 13 ёшли қизнинг бошига болға билан уриб, хонадондан тақинчоқ ҳамда пул ўғирлаган аёл ушланди. Бу ҳақда вилоят Ички ишлар бошқармаси ахборот хизмати хабар берди.
Фото: Бухоро вилояти Ички ишлар бошқармаси ахборот хизмати
Таъкидланишича, 16 ноябрь куни соат 18:10 да Бухоро шаҳар Ички ишлар органлари фаолиятини мувофиқлаштириш бошқармаси навбатчилик қисмига шошилинч тез ёрдам илмий маркази Бухоро филиали навбатчи шифокори қўнғироқ қилган. Унда шаҳарнинг Муртазоев кўчасида яшовчи 2009 йилда туғилган 5-синф ўқувчиси Ф.М. исмли қиз бош соҳасидан тан жароҳати олиб, касалхонага ётқизилгани маълум қилинган.
Фото: Бухоро вилояти Ички ишлар бошқармаси ахборот хизмати
Мазкур ҳолат юзасидан олиб борилган тезкор суриштирув ва тергов ҳаракатлари давомида вояга етмаган Ф.М. ўз уйида ёлғиз бўлган вақтда у истиқомат қилиб келаётган кўп қаватли уйнинг 1-қаватидаги гўзаллик салонида ишловчи 1985 йилда туғилган Бухоро туман Тор-Тор маҳалласида яшовчи аёл М.Ш. уйда вояга етмаган қизнинг ёлғизлиги ва ота-онасининг чиқиб кетганлиги фурсатидан фойдаланган ҳолда хонадонга кирган. Шундан сўнг вояга етмаган Ф.М.нинг бош қисмига ёнида ўзи билан олиб келган қўлбола усулда тайёрланган темир болға билан уриб, унинг юзига ёстиқ билан босиб бўғган.
Шундан сўнг Ф.М. ҳушидан кетганидан сўнг уни ўлди деб ўйлаб, хонадондан 12 хил турдаги аёллар тилла ва кумуш тақинчоқлари, 100 доллар ва 6 миллион 250 минг сўм нақд пулларни ўғирлаб кетганлиги аниқланган ҳамда гумон қилинувчидан ўғирланган тақинчоқ ва пуллар тегишли тартибда ҳужжатлаштириб олинган.
Фото: Бухоро вилояти Ички ишлар бошқармаси ахборот хизмати
Мазкур ҳолат юзасидан шаҳар прокуратураси томонидан М.Ш.га нисбатан Жиноят кодексининг 25, 97-моддаси (Қотилликка суиқасд) 2-қисми «и» банди ва 164-моддаси (Босқинчилик) 3-қисми «а» банди билан жиноят иши қўзғатилган ҳамда жиноят содир қилганликда гумон қилинувчи М.Ш. қамоққа олинган. Ҳозирги кунда дастлабки тергов ҳаракатлари давом эттирилмоқда.
Фото: Бухоро вилояти Ички ишлар бошқармаси ахборот хизмати
Аввалроқ Янгиқўрғонда аёл ер талашиб, ўзи ва 2 нафар фарзандини сувга ташлаб ўлдиргани ҳақида хабар берилганди. Шунингдек, Избосканда танишини пичоқлаган 18 ёшли йигит қамоққа олинган.
