«Ёлғон ахборотнинг оқибати билан эмас, сабаби билан курашсак, натижа бўлади» — Расул Кушербаев

Ўзбекистон Олий Мажлиси Қонунчилик палатаси депутати Расул Кушербаев «Tez News»га берган интервьюсида фейк (ёлғон ахборот), факт чекинг (ахборотнинг тўғрилигини, ростлигини текшириш) ва одамларнинг фақат салбий фикр билдириш ҳолатларининг сабаблари ҳақида ўз фикрларини билдирди.

Депутат Расул Кушербаев шахсий фикрга эга бўлиш жуда катта аҳамиятга эга эканлигини, жамиятнинг ҳар бир аъзоси ҳар доим ҳам ўзининг шахсий фикрига эга бўлмаслигини таъкидлаган. Шунингдек, омма ёки кўпчилик нима деса, ўша фикрга, «оқим»га қараб сузиб кетаверадиганлар ҳар қандай жамиятда ҳам мавжудлигини, бироқ улар кўп бўлса, зарар келтириши ҳақида айтиб ўтган.

«Aввало, инсон шахсий фикрига, ўзининг ‘мен’ига қачон эга бўлади, қачонки ахборотни, фикрларни озроқ бўлса-да, таҳлил қила олиш имкониятига эга бўлса. Бу эса ўз-ўзидан ўқишни, қунтни ва ҳар бир олган маълумотини таҳлил қилиш кўникмасини талаб қилади», — дейди депутат.

Шунингдек, депутат асосланмаган салбий фикрларни айтувчи одамлар ўз фикрига эга бўлмаган, ким нима деса, ишониб кетаверадиган инсонлар бўлиши ҳақида гапирган.

«Энг ёмон таъсир қиладиган ҳолатлар ҳам мана шундай одамлар орқали амалга оширилади. Яъни ёлғон ахборотни ташлаб қўйиб, уларнинг бақир-чақири билан иш битирмоқчи бўлган тоифалар бўлади. Бу яхшимас, аслида.

Биз ёлғон ахборот ёки мана шунақа нотўғри ҳатти-ҳаракатлар ҳақида гапирамиз, лекин унинг оқибати билан эмас, аввало, сабаби билан курашишга ўтсак, яъни одамларни фикрлашга, нима яхши, нима ёмон эканлигини ўзи таҳлил қила олиш даражаси учун тарбиялаш усулига ўтсак, шунда натижа бўлади. Бўлмаса, бир кун битта чиққан ёлғон ахборотнинг оқибатини бартараф қиласиз, лекин эртага яна ўнтаси чиқади. Ҳар биттаси билан алоҳида шуғулланиш эса одамни чарчатади.

Ўсиб келаётган авлод бор. Мактабда нимани ўргатяпти? Таҳлил қилишни, ахборотни синтез-анализ қилиш, қайси тўғри, қайси ёлғонлигини қандай ажратиб олиш мумкинлигини, ҳар бир олаётган ахборотни камида икки-уч манба орқали текшириб кўриш кераклигини, ана ўшанда тўғри бўлишини ўргатиш керак. Шундан келиб чиқиб, таълим бериш услубларини ҳам ўзгартириш зарур», — дейди Расул Кушербаев ўз сўзлари давомида.

Бундан ташқари, депутат мактабларда илгари бошқа фанларга урғу берилганини, энди эса замон талабидан келиб чиқиб, ахборот, омма билан ишлаш борасида янги курслар қўшиш кераклигини таъкидлаган.

«Таълим ва тажрибасиз қатламнинг кириб келиши фақат эгоистик кайфият билан яшаш, фақат салбий фикрлаш ва ҳоказоларни келтириб чиқаради. Бироқ бунга одамларнинг ўзи айбдор, дея олмаймиз. Бунга биз айбдормиз — жамиятнинг олд қатлами вакиллари айбдор. Чунки улар бундай фикрламасликлари учун тартиб-шароитни тўғри қилиб бериши керак. Сўнг у томон (жамият)дан ҳам ташаббус бўлиши керак. Aгар у томондан олма пиш, оғзимга туш, дейиладиган бўлса, ўша жамият энг пастки қатламда, яшаш шароити ҳам яхши бўлмаган тарзда қолаверади», — дейди депутат Кушербаев.

Эслатиб ўтамиз, Расул Кушербаев интервью давомида масъул раҳбарлар халқнинг мурожаатларини «копток» қилиши керак эмаслиги, энг катта муаммо рост ва ёлғон ахборотни ажратиб олишдалиги ҳамда нега аҳоли орасида Президент порталига мурожаат қилиш ҳолати авж олганлиги ҳақида ўз фикрларини билдириб ўтган.