Фарғонада 41 та ҳолатда фирибгарликка қўл урган эркак 6 йилга қамалди

Фарғона вилояти Фарғона шаҳрида 41 та фирибгарлик ҳолатига қўл урган эркак 6 йилга қамалди. Бу ҳақда Олий суд матбуот хизмати хабар берди.

Маълум қилинишича, олти йилга қамалган Фарғона шаҳрида яшовчи 32 ёшли шахс 10 дан ортиқ фуқаронинг номига тижорат банклари, кредит савдо дў­конлари, микрокредит ташкилотларидан пул маблағлари ҳамда маиший техника буюмларини олиб, қарзларини қай­тармай, 41 та ҳолатда фирибгарликка қўл урган. Жабрланувчиларнинг ҳуқуқни муҳофаза қилувчи идораларга қилган мурожаатига биноан фирибгарга нисбатан жиноят иши қўзғатилган.

Қайд этилишича, фирибгар қуйидаги шахслар номига кредит маблағлари ва маиший техника буюмлари олган:

рафиқасининг номига 2018 йилнинг февраль ойида «Ўзсаноатқурилишбанк»нинг Фарғона минтақавий филиалидан 4 050 000 сўм миқдорида кредит, 2018 йилнинг июнь ойида «Ҳамкорбанк»нинг Истиқбол филиалидан 7 000 000 сўм миқдорида кредит, 2018 йил сентябрь ойи­да «Ишонч» кредит савдо дў­конидан 14 279 000 сўмлик маиший техника буюмлари;

рафиқасининг 3 нафар ҳамкасби номига «Aло­қабанк»­нинг Фарғона филиалидан 8 000 000 сўм миқдорида кредит, 2018 йил ноябрь ойида «Ишонч» кредит савдо дўконидан 3 794 000 сўм­лик маиший техника буюмлари, 2019 йил январь ойида «Капиталбанк»нинг Фар­ғона филиалидан 6 000 000 сўм миқдорида кредит маблағи, 2019 йил февраль ойида «Қишлоққурилишбанк»нинг Марғилон филиали ва «Капиталбанк»нинг Фарғона филиалидан жами 17 000 000 сўм миқдорида кредит маблағи;

Фарғона шаҳри Aлишер Навоий номидаги маҳалла фу­қаролар йиғини котибаси номига «Капиталбанк»нинг Фарғона филиалидан 9 000 000 сўм, «Ипотекабанк»­нинг Фарғона вилоят филиа­лидан 10 000 000 сўм миқдорида кредит маблағи ва «Гаранд» кредит савдо дўконидан 3 206 000 сўмлик маиший техника буюмлари;

2018 йил октябрь ойидан 2019 йил февраль ойи­га қадар 4 нафар фуқаро номига «Фартуна бизнес» микрокредит ташкилотидан 57 000 000 сўм кредит маблағи ҳамда «Ишонч» ва «Гаранд» кредит савдо дўконларидан 5 145 000 сўмлик маиший техника буюмлари, 2019 йил март ойида 4 нафар фуқаронинг биридан 900 доллар миқдорида қарз.

Жиноят ишлари бўйича Фарғона шаҳар суди фирибгарни Жиноят кодексининг 168-моддаси 3-қисми «б» банди билан айбдор деб топиб, 6 йил муддатга озодликдан маҳрум қилиш жазосига маҳкум этган. Шу билан бирга, судланувчидан «Ўзсаноатқурилишбанк», «Ҳамкорбанк», «Aлоқабанк», «Капиталбанк», «Aгробанк», «Ипотека банк», «Микрокредитбанк», «Қишлоққурилишбанк» Фарғона филиаллари, «Техномарт» номли савдо дўкони, «Гарант мебеллари», «Фарғона Бест Мебель», «Фарғона Ишонч савдо» масъу­лияти чекланган жа­мият­лари, «Фортуна бизнес» микрокредит ташкилоти, «Мунис мебеллари» савдо дўкони ва 5 нафар фуқаро фойдасига 239 588 616 сўм­лик моддий зарарни ундириш белгиланган.

Эслатиб ўтамиз, аввалроқ Қўқонда «Captiva» олиб беришини айтиб, фуқаронинг 22 800 доллар пулини ўз эҳтиёжларига сарфлаб юборган фирибгар ушлангани ҳақида хабар берилган эди. Шунингдек, Марғилонда қарзга олинган 4 та машинани сотиб, пулини эҳтиёжига сарфлаб юборган фирибгар ушлангани маълум қилинди.