Санкт-Петербургда мусулмонлар ёмғир ва карантин чекловларига қарамай Қурбон ҳайити намозини жамоат бўлиб ўқиди (видео)
Санкт-Петербургда 31 июль куни юзлабмусулмонлар ёмғир ва карантин чекловларига қарамай Қурбон ҳайити намозини жамоат бўлиб ўқиди.
Кадр: Телеграм
Россиянинг Шимоли-ғарбий минтақаси ва Санкт-Петербург Мусулмонлар диний идораси раҳбари, муфтий Равиль Панчеев мусулмонлардан уйда қолишини сўраган бўлса ҳам кўпчилик масжидга ҳатто тиббий ниқоб тақмасдан келган. Ҳайит намози тинч ва хавфсиз ўтди. Ҳуқуқни муҳофаза қилиш органи ходимлари жамоат тартибига масъуллик қилди.
Маълумот учун, муфтий Равиль Панчеев фуқаролардан Қурбон ҳайитининг биринчи куни уйда қолишларини ва онлайн ибодат қилишларини сўраган. Аммо хоҳловчилар ҳарорати юқори бўлмаган тақдирда масжидга киритилишини ҳам таъкидлаган.
Эслатиб ўтамиз, Ўзбекистон мусулмонлари идораси Уламолар кенгаши 25 июль куни карантин шароитида Қурбон ҳайитини нишонлаш бўйича тавсияларини эълон қилинганди. Унга кўра, Қурбон ҳайити куни мўмин-мусулмонларга ўз хонадонларида қуёш терак бўйи кўтарилгандан кейин тўрт ракатли нафл намози ўқиш тавсия этилди.
Шавкат Мирзиёев Қурбон ҳайитининг биринчи кунини нишонлаш тўғрисида қарор қабул қилган эди. Шунингдек, Президент Ўзбекистон халқига байрам муносабати билан Ўзбекистон халқига табрик йўллади. Кейинчалик, Ўзбекистон мусулмонлари идораси карантин шароитида қурбонлик қилиш тартибини маълум қилди.
Эслатиб ўтамиз, Ўзбекистонда Қурбон ҳайити куни сутка давомида ҳаракатланиш тўлиқ тўхтатилади.
