Вьетнамда кучли тайфун сабабли 600 мингга яқин одам эвакуация қилинади

Вьетнам ҳукумати кучли тўфондан зарар кўриши мумкин бўлган бир қанча провинциянинг 586 минг аҳолисини эвакуация қилишини эълон қилди. Бу ҳақда CNBC хабар бермоқда.

«Каджики» тўфони якшанба куни кечқурун Хитойнинг Хайнан ороли провинцияси жанубий қирғоқларидан ўтиб, Вьетнам томон йўналиши кутилмоқда.

Вьетнам миллий об-ҳаво прогноз агентлиги маълумотларига кўра, бўрон кучайиб, шамол тезлиги соатига 166 км га етган.

Вьетнам ҳукумати дўшанба куни эрталаб келиши кутилган тайфун муносабати билан марказий Тханьхоа, Куангчи, Хюэ ва Дананг провинцияларидан 586 мингдан ортиқ аҳолини эвакуация қилишни режалаштирмоқда, — дейилади хабарда.

Шунингдек, режалаштирилган йўналишдаги аҳоли соат 14:00 дан кейин кўчага чиқмасликлари кераклиги, ҳарбийлар эса ёрдамга тайёр экани маълум қилинди.  Шу билан бирга, Vietnam Airlines якшанба ва душанба кунлари камида 22 та марказий шаҳарларга ва улардан амалга оширилиши керак бўлган рейсларни бекор қилди.