Исроил ҳукумати Ғазода ўт очишни тўхтатиш бўйича келишувни маъқуллади
Исроил вазирлар маҳкамаси 10 октябр кечаси, ҲАМАС гуруҳи билан тузилган сулҳ келишувини тасдиқлади. Бош вазир девони маълумотига кўра, шу пайтдан бошлаб ўт очишни тўхтатиш режими кучга киради.
Ушбу Ҳужжат 9 октябр куни Мисрнинг Шарм ал-Шайх шаҳрида АҚШ президенти Доналд Трампнинг тинчлик режаси асосида имзоланган. Биринчи босқич шартларига кўра, Исроил мудофаа армияси ўз қўшинларини Ғазо сектори ичидаги «сариқ чизиқ» деб аталувчи ҳудудгача ортга олади. Шунингдек, қўшинларни қайтариш жараёни 24 соат ичида якунланиши режалаштирилган.
Шундан сўнг 72 соат ичида ҲАМАС барча тирик гаровдагилар ва ҳалок бўлганларнинг жасадларини Исроилга топшириш мажбуриятини олган. Reuters агентлиги маълумотига кўра, тирик гаровдагилар яқин кунларда қайтарилиши кутилмоқда, ҳалок бўлганларнинг жасадларини қидириш ва шахсини аниқлаш эса кўпроқ вақт олиши мумкин.
