Ўзбекистон футбол ассоциацияси $300 мингдан ортиқ жаримага тортилди
Осиё футбол конфедерациясининг (ОФК) тартиб-интизом қўмитаси, Ўзбекистон футбол ассоциациясини (ЎФА) жаримага тортди.
Аниқланишича, ЎФА томонидан ЖЧ-2026 саралашидаги Қатарга қарши ўйинида ОФК билан келишилмасдан ёпилиш маросими ташкил қилиниб, BYD автомобиллари олиб чиқилган. Автомобиллар терма жамоа футболчилари ва мураббийларига тақдим этилган.
Маълум қилинишича, ОФКнинг тижорат ҳамкорларининг ҳуқуқлари ҳимояси таъминланмаган ва яширин маркетинг элементларига йўл қўйган.
Шунингдек, матбуот анжуманлари ва бошқа расмий тадбирларни ўтказишда зарур кўмак кўрсатилмаган. Ушбу қоидалар бузилганлиги сабаб 340 минг доллар миқдорида жарима белгиланган. Жаримани қарор ҳақида хабар берилган кундан бошлаб 30 кун ичида тўлаш талаб этилади.
