Ўзбекистон ТИВ Эрон ва Исроилни вазминликка чақирди
Ўзбекистон Ташқи ишлар вазирлиги Исроилнинг Эронга қарши амалга оширган ҳарбий амалиётлари юзасидан хавотир билдирди.
Расмий баёнотга кўра, можаро Яқин Шарқда вазиятнинг янада кескинлашуви ва инсонлар ҳалок бўлишига олиб келмоқда.
Вазирлик барча томонларни ҳарбий ҳаракатларни зудлик билан тўхтатишга, вазминликни сақлашга ҳамда низони сиёсий-дипломатик йўл билан ҳал этишга чақирди.
Шунингдек, Ўзбекистон минтақавий барқарорликни мустаҳкамлаш тарафдори эканини яна бир бор таъкидлаб, кескинликни камайтириш бўйича саъй-ҳаракатларга кўмаклашишга тайёрлигини билдирди.
Аввалроқ, Исроил 13 июнга ўтар кечаси Эронга йирик ҳарбий ҳужум уюштирган, бунинг ортидан Эрон ҳаво ҳудудини ёпган ва фавқулодда ҳолат эълон қилган эди.
Ўзбекистоннинг Исроилдаги элчихонаси ўзбекистонликларни эҳтимолий хавфларга тайёр туришга ва хавфсизлик чораларига риоя қилишга чақирган.
