Самарқанд шаҳар бош имом-хатиби Нуриддинхон Исломов 73 ёшда вафот этди

Самарқанд шаҳар бош имом-хатиби Нуриддинхон Исломов 22 cентябрь куни 73 ёшда вафот этди. Бу ҳақда шаҳар ҳокимлиги матбуот хизмати хабар берди.

Фото: Самарқанд шаҳри ҳокимлиги матбуот хизмати

Таъкидланишича, Нуриддинхон Исломов 1970 йилда Ўзбекистон мусулмонлари идораси ходими вазифасида иш фаолиятини бошлаган. 1980 йилдан 2008 йилга қадар Жиззах вилояти Ғаллаорол тумани бош имом-хатиби вазифасида фаолият олиб борган. 2017 йилгача Самарқанд вилояти бош имом-хатиби вазифасида ишлаган.  Шундан сўнг айни пайтгача Самарқанд шаҳар бош имом-хатиби ҳамда «Шоҳи Зинда» жомеъ масжиди имом-хатиби лавозимида фаолият олиб бораётган эди.

«Самарқанд шаҳар ҳокимлиги Нуриддинхон Исломовнинг вафоти муносабати билан унинг оила-аъзолари ва барча яқинларига ҳамдардлик билдириб, чуқур таъзия изҳор этади», дейилади ҳокимлик хабарида.

Aввалроқ Тошкент вилояти бош имом-хатиби Хайрулла Турматов вафот этгани ҳақида хабар берилганди. Шунингдек, Самарқанд шаҳар 1-сонли туғруқ мажмуаси бош врачи 56 ёшида вафот этгани хабар қилинган.