АҚШда юк самолёти қулади: 7 нафар киши ҳалок бўлди
АҚШнинг Кентукки штатида UPS компаниясига тегишли MD-11 юк самолёти ҳалокатга учради, деб CNN хабар берди.
Фожиа Луисвилдан Гонолуга йўл олган самолёт ҳавога кўтарилгандан кўп ўтмай содир бўлган. Самолёт қулагандан сўнг кучли ёнғин келиб чиққан ва катта ҳудудни қамраб олган.
Маҳаллий ҳокимиятлар «Грейд-лейн» автомагистралини ёпиб қўйди ва 8 км радиусдаги аҳоли вақтинча эвакуация қилинди. Кучли ёнғинга самолётнинг тўла ёқилғи баки сабаб бўлган бўлиши мумкинлиги айтилмоқда. Аммо ҳалокатнинг аниқ сабаби ҳали хабар қилинмаган.
Кентукки штати губернатори Энди Беширнинг маълум қилишича, самолёт ҳалокати натижасида етти киши вафот этган, яна 11 киши жароҳат олган. Қурбонлар сони ошиши мумкин.
