Самарқандда 3 сентябрь куни қанча абитуриент имтиҳонга келмагани, нечтаси синовлардан четлаштирилгани маълум бўлди
Самарқанддаги еттита очиқ майдонда 3 сентябрь куни ўтказилган тест синовларида 12240 нафар абитуриент қатнашиши белгиланган эди, аммо улардан 11 094 нафари синовларни топширди. Бу ҳақда «Zar News» хабар берди.
Mаълумотларга кўра, биринчи сменада 614 нафар абитуриент тестга келмади, 11 нафари белгиланган қоидаларни бузгани учун тестдан четлаштирилди.
Иккинчи сменадаги синовларда эса 5599 нафар абитуриент иштирок этди. 513 нафари тест ўтказиладиган жойларга келмади, 8 нафари эса синовлардан четлаштирилди.
Эслатиб ўтамиз, ДТМ Сирдарё вилоятидаги тест синовида телефондан фойдаланган абитуриентга тегишли чора кўрилишини маълум қилган. Маълумот учун, Ўзбекистон бўйича 37 нафар абитуриент биринчи сменада тестдан четлаштирилган.
Аввалроқ, абитуриентларга кириш имтиҳонларига бош кийим билан келишга рухсат берилгани, ОТМларга кириш имтиҳонлари усти очиқ стадионларда ўтказилиши ҳақида хабар берилган эди.
