ИИВ карантин зоналаридаги «IMEI иши» тафсилотларини очиқлади
Ўзбекистон бўйича барча карантин зоналари ва чегара постларида фуқароларнинг паспортларига ноқонуний равишда IMEI-кодлари рўйхатдан ўтказилган. Жиноий гуруҳ таркибида фаррошдан тортиб мансабдорларгача бор, дея маълум қилди Ички ишлар вазирлиги Киберхавфсизлик маркази «Газета.uz»га.
Фото: «Газета.uz»
Қайд этилишича, Ўзбекистонда IMEI соҳасида амалга оширилган ишлар ва 2020 йил сарҳисобига бағишланган матбуот анжуманида Ички ишлар вазирлиги масъул ходими Бахтиёр Сулаймонов фуқароларнинг паспорт маълумотларидан ноқонуний равишда фойдаланиб, улардан мобил қурилмаларда IMEI-кодларини киритишда фойдаланганлик ҳолати аниқланганини маълум қилган.
Шунингдек, у бу каби жиноят сўнгги бор 2020 йил октябрида аниқланганини ҳам қўшимча қилган.
«Бу бўйича расман 7 мингга яқин ҳолатлар аниқланган. Балки, бундан ҳам ошар, чунки тергов ҳаракатлари давом эттирилмоқда. Фуқаролар мурожаат этгани ва этмагани бор. Мурожаат этганларни биз рўйхатга олиб, терговга йўналтирганмиз.
Уюшган жиноий гуруҳ таркибида карантин зонада ишлаган оддий фаррошдан тортиб, мансабдор шахсгача бор. Ким қайси даражада жиноят содир қилгани ҳали маълум эмас. Тергов давом этмоқда. Янги ҳолатлар аниқланиб, терговга қўшиб борилмоқда. 7 минг нафарнинг ичида фуқаролар ўзи мурожаат қилгани бор. Уюшган жиноий гуруҳ томонидан содир этилгани, аниқ рақамини билмайман, лекин 5 минг нафардан ўтган. Республика бўйича карантин зоналарини ҳаммасида кузатилган бу ҳолат. Битта Андижондамас, Тошкент вилоятида ва бошқа жойда ҳам кузатилган», — деди ИИВ масъул ходими Бахтиёр Сулаймонов .
Таъкидланишича, бу каби жиноятлар фақатгина карантин зоналарда аниқланмаган, балки божхона чегара пунктларида ҳам уюшган гуруҳлар шу каби ҳаракатларни амалга оширган. Давлат божхона қўмитаси бош инспектори Бахтиёр Кабировнинг айтишича, Андижонда ҳам шу каби ҳолат кузатилган.
«Қўмита вакиллари томонидан Қирғизистон томонга ўтиб, у ердан паспортларни олиб, 5 доллардан 20 долларгача бўлган қийматда сотиб олиб, ҳар битта чегарадан ўтган фуқаро номига мобил қурилмаларнинг IMEI-кодларини рўйхатга олиб, ўтказаётгани аниқланган. Тегишли процессуал ҳужжатлар расмийлаштирилган. Бугунги кунда бу бўйича тергов олиб бориляпти», — дея маълум қилди Бахтиёр Кабиров.
Мавзуга доир:
Эслатиб ўтамиз, аввалроқ Ўзбекистонда телефонларнинг IMEI-кодларини рўйхатдан ўтказиш тартибига ўзгартириш киритилганди. Унга кўра, Ўзбекистон ҳудудида мобиль қурилмалар чакана савдоси билан шуғулланувчи тадбиркорлик субъектлари мобил қурилмаларни республика ҳудудига олиб кириш санасидан қатъи назар, уларни рўйхатдан ўтказиш учун жавобгар бўлади.
