АҚШда шифокор «Pfizer» вакцинаси билан эмланганидан кейин вафот этди
Қўшма Штатларда шифокор «Pfizer» вакцинаси билан эмланганидан салкам икки ҳафта ўтгач вафот этди. Бу ҳақда «Daily Mail» 8 январь, жума куни марҳум рафиқасининг сўзларига таяниб хабар берди.
Фото: «Reuters»
Марҳумнинг рафиқаси Хайди Некельманн унинг 56 ёшли эри Грегори Майкл 18 декабрда эмланганини ва 16 кундан кейин вафот этганини айтган.
«Менинг фикримча, унинг ўлими эмлаш билан 100 фоиз боғлиқ эди. Бунга бошқа изоҳ йўқ», — дейди Некельманн. Унинг сўзларига кўра, Майкл фаол ҳаёт тарзи билан шуғулланган, чекмаган, фақат вақти-вақти билан спиртли ичимликлар ичган. Бундан ташқари, тиббий кўрик пайтида ундан ҳеч қандай касаллик аломатлари топилмаган.
Айтилишича, эмлашдан уч кун ўтгач, эркак қўллари ва оёқларида қизил доғларни пайқаб, териости қон кетиши кузатилаётганини билиб қолган. Текширувда шифокорда тромбоцитлар етишмовчилиги аниқланган. Шифокорлар унда идиопатик тромбоцитопеник пурпура касаллиги ташхисини қўйган. 3 январь, якшанба куни эркак жарроҳлик амалиётидан олдин мияга қон қуйилиши оқибатида вафот этган.
«Pfizer» компанияси матбуот хизмати улар Майклнинг ўлими бўйича иш олиб борилаётганини айтган. Шунингдек, компания мутахассислари вакцина ва ўлим ўртасида тўғридан-тўғри боғлиқликни кўрмаётганлигини таъкидлаган.
Аввалроқ АҚШда «Pfizer» вакцинаси билан боғлиқ жиддий ҳолат қайд этилгани, коронавирусга қарши вакцина билан эмланган яна бир исроиллик эркак вафот этгани ҳақида хабар берилган эди.
