Ўзбекистонда электр энергетика тармоғининг ишлаш тартиби тўлиқ тикланди

Ўзбекистондаги бир қатор иссиқлик электр станцияларида 4 январь куни қисман электр узилишлари юз бергани хабар қилинган эди. Энергетика вазирлиги мамлакатда электр энергетика тармоғининг ишлаш тартиби тўлиқ тикланганини маълум қилди.

Фото: «Tez News»

Хабарга кўра, 5 январь куни Марказий Осиё ягона энергия тизимининг электр узатиш тармоқларидаги носозликларга сабаб бўлган электр энергиясини ишлаб чиқариш жараёнини ўрганиш учун тузилган комиссия ҳодиса сабабини аниқлаган.

Маълум бўлишича, Талимаржон ИЭСдаги буғ-газ қурилмалари ортиқча юклама билан ишлаши оқибатида носозлик юзага келган ва аварияга қарши автоматика ишлаб режадан ташқари ўчирилган. Натижада Марказий Осиёнинг ягона энергия тизимини (ЯЭТ) Россия ва Қозоғистоннинг ягона энергия тизими билан боғлайдиган транзит тармоқларида юклама кескин кўтарилган. Бу эса энергия тизимларининг параллель ишлаши барқарорлигининг бузилишига олиб келган.

Натижада Қозоғистон шимолий қисмининг энергия тизимлари Марказий Осиёнинг ЯЭТидан ажралиб чиқди. ЯЭТ МО частотаси 48,15 Гс.гача камайган. Шу билан бирга, бир қатор истеъмолчилар автоматик равишда тармоқдан узиб қўйилган, иссиқлик электр станцияларининг (ИЭС) энергия блоклари юкламалари туширилган.

Таъкидланишича, аварияга қарши автоматик бошқариш тизими энергия блоклари учун катта миқдордаги муаммолар ва зарарли оқибатларнинг олдини олишга хизмат қилади. Тадбирлар таҳлили асосида ва шу каби ҳодисаларнинг олдини олиш мақсадида режали чоралар ишлаб чиқилмоқда.

Эслатиб ўтамиз, аввалроқ Намангандаги ИЭСда юз берган фавқулодда ўчиш туфайли вилоятнинг катта ҳудуди электрсиз қолгани ҳақида хабар берилганди. Таъкидланишича, Тўрақўрғон ИЭСдаги 2 та электр ишлаб чиқариш агрегати аварияли ҳолатда ўчиши сабабли 750 мегаватт қувват йўқотилган.

Шунингдек, Танзила Норбоева Сенат ялпи мажлисида ҳудудлардаги электр энергияси ва газ муаммоси ҳақида гапиргани ҳамда самарқандлик сенатор сўнгги пайтларда электр энергияси тинимсиз ўчаётганидан шикоят қилгани хабар қилинган.