Ўзбекистонда вакцина синовида қатнашмоқчи бўлганларнинг 30 фоизи коронавирусни аломатларсиз ўтказган — вазир

Хитой вакцинаси синовининг учинчи босқичида қатнашмоқчи бўлганларнинг 30 фоизида COVID-19’га антитаналар аниқланган. Улар касалликни аломатларсиз ўтказган. 7 январь ҳолатига кўра, 1328 киши эмланган. Бу ҳақда Инновацион ривожланиш вазири Иброҳим Абдураҳмонов «Daryo»га берган интервьюсида маълум қилди.

Фото: Халқаро пресс-кулб

Вазирнинг айтишича, 18 декабрдан 6 январгача вакцина синовида кўнгилли сифатида иштирок этиш истагини билдирган 3 минг нафар фуқаро кўрикдан ўтказилган. Улардан фақат 1270 нафари — «ҳеч бирида шубҳали касалликлари йўқ» кўнгиллилар «ўз хоҳиш ва розиликлари билан, тадқиқот шартномаси имзо қўйиб», эмланган.

Қайд этилишича, вакцина олиш истагидаги фуқароларнинг ҳар бири билан суҳбатлашиб, уларнинг касаллик тарихи, психологик ҳолати ўрганилмоқда. Мурожаат қилаётган кўнгиллилар биринчи куни тиббий кўрикдан ўтказилиб, коронавирусга тест олиняпти, антитаналари текширилмоқда. Иккинчи куни эса эмланяпти.

«Кўнгиллилар билан суҳбат чоғида фуқаролардан тиббий ҳолатлари тўғрисида маълумот олинади, хусусан, аввал COVID-19 касаллигига чалинган-чалинмагани сўралади — коронавирус билан оғриган кишиларда синов ўтказилмайди. Шу суҳбат жараёнининг ўзида тахминан 10 фоиз кўнгилли эмлашдан воз кечмоқда ёки тиббий кўрсатмаларга кўра уларнинг вакцина олиши рад этилмоқда.

Суҳбатдан ўтган мурожаатчилардан қон таҳлили олинади. Шу босқичда қон таҳлили топширганлардан тахминан 30 фоизининг организмида коронавирусга қарши антитаналар борлиги аниқланмоқда. Булар коронавирусни ўзи билмаган ҳолда, аломатларсиз енгиб ўтган шахслар ҳисобланади. Улар соғлом бўлишига қарамай, эмланишга жалб қилинмаяпти. Чунки бу вакцина самарасини текширишга халал беради», — деди вазир Иброҳим Абдураҳмонов.

Унинг сўзларига кўра, тиббий кўрикдан ўтиб, вакцина олишга лойиқ, деб топилганларга яна бир бор қайта ўйлаб кўришлари учун бир кун имконият берилмоқда — ҳеч ким уларни эмланишга мажбур қилмайди. Ҳозиргача 10 фоиз кўнгилли иккиланган ҳолда эмланишдан воз кечган.

Журналист Муҳрим Аъзамҳўжаев ҳам ўзининг Telegram каналида Ўзбекистондаги вакцинация жараёнлари ҳақида фикр билдириб, пост қолдирган.

«Шу кеча-кундузда ўзини соғ, ‘мен ковид бўлмадим’, деб ҳисоблаб юрган 3 минг кишининг салкам учдан бири аслида касалликни аллақачон ўтказиб бўлган. Бу ҳали Ўзбекистоннинг фақат пойтахтидаги ҳолат. Аслида қанча аҳоли яшашини раҳбарлари ҳам билмайдиган Тошкентга ёйиб юбор шу рақамни (расмий 2,5 миллион деган сонни олсанг ҳам 30 фоизи 750 минг бўлади). Дарвоқе, 7 январь ҳолатига кўра Ўзбекистонда расман 77 412 кишида коронавирус аниқланган, шундан 45 294 нафари Тошкентда», дейилади постда.

Маълумот ўрнида, Ўзбекистонда коронавирусга қарши ZF 2001 вакцинасининг III фаза синовларида иштирок этган фуқаролар сони 8 январь ҳолатига кўра жами 1270 кишини ташкил этган. Уларнинг ҳаммаси ҳам вакцина билан эмланмаган, айримларига плацебо, яъни вакцина билан бир хил кўринишга эга, ўзида номзод вакцина ёки дори воситасини сақламаган бирикма юборилган.

Аввалроқ АҚШда «Pfizer» вакцинаси билан боғлиқ жиддий ҳолат қайд этилгани, коронавирусга қарши вакцина билан эмланган яна бир исроиллик эркак вафот этгани ҳақида хабар берилган эди.