Автомобилларга экостикерлар ёпиштириш билан «Экологик транспорт» тизимини ишга тушириш кейинги йилга қолдирилди
Ўзбекистон ҳукумати Экологик транспорт тизимини жорий этиш муддатларини қайта кўриб чиқди, деб ёзади Norma.
Вазирлар Маҳкамаси саноат тармоқларида экологик вазиятни яхшилашга қаратилган бир қатор қарорларга ўзгартиришлар киритди.
Ҳужжат Экологик транспорт тизимини босқичма-босқич жорий этиш муддатларини ўзгартиришни назарда тутади. Уни амалга ошириш 2025 йил 1 мартдан бошланади (илгари 2024 йил 1 июнь деб белгиланган эди).
Худди шу кундан бошлаб транспорт воситаларининг меъёрий ҳужжатларга мувофиқлик даражасини аниқланиб уларга экологик стикерлар берилишни бошланади.
Эслатиб ўтамиз, «Экологик транспорт» тизими доирасида ҳудудлар экологик ҳолатига кўра «тоза», «ўртача» ва «зарарли» экологик зоналарга бўлиниши режалаштирилган. Ташхисдан сўнг транспорт воситаларига «яшил», «сариқ» ва «қизил» стикерлар қўйилади.
Экологик тоифаси экологик зонага тўғри келмайдиган транспорт воситаларидан компенсация тўланади ёки тегишли экологик зонага кириши чекланади.
Бундан ташқари, қабул қилинган ҳужжатга мувофиқ, қуёш фотоэлектр станцияларини биноларнинг томлари ва фасадларига ўрнатиш учун давлат экологик экспертизасидан ўтказиш учун лойиҳа ҳужжатларини тақдим этиш талаби бекор қилинди.
Шунингдек, атроф-муҳитга ва унга туташ ҳудудларга таъсир кўрсатувчи саноат корхоналарида «яшил белбоғлар» яратиш ва жорий етиш чоралари кўрилади.
Ҳужжат 5 июльдан кучга кирди.
