Шенген визаси қимматлашиши мумкин — қанчалигини айтамиз

Европа комиссияси Шенген визаси учун базавий йиғимни 12%га ошириш таклифи билан чиқди. Ташаббус маъқулланган тақдирда, нархлар 2024-йил ёз мавсуми бошлангунига қадар кўтарилиши мумкин, хабар берди Euronews.

Таклифга кўра, базавий тўловни катталар учун €80 дан €90га, болалар учун €40 дан €45 га оширишмоқчи. Шунингдек, хизмат кўрсатиш йиғимларининг нархи ошади.

Европа комиссияси ноқонуний миграция ва виза тартибини бузганлик учун Европадан қувилган фуқароларини қайтариш бўйича Европа Иттифоқи билан ҳамкорлик қилишга тайёр бўлмаган давлатлар учун божни оширишни таклиф қилди.

Учинчи мамлакат билан реадмиссия бўйича етарлича ҳамкорлик қилинмаган тақдирда ушбу мамлакатларнинг фуқаролари учун Шенген визаси нархи €120/€160 дан €135/€180 гача ошиши мумкин.

Қайд этиш жоизки, нарх ошиши Шенген ҳудудига ҳар ярим йилда 90 кунга визасиз кириш ҳуқуқига эга бўлмаган мамлакатларга тааллуқли.