«Уларнинг маслаҳатлари билан катта поғоналарга чиқдим». Актриса Раъно Шодиева Танзила Норбоеванинг шахсий дизайнери бўлгани ҳақида — видео

Таниқли актриса Раъно Шодиева YouTube’даги «Мирсадикова билан» каналига берган интервьюсида бир пайтлар Сенат раиси Танзила Норбоеванинг шахсий дизайнери бўлгани ҳақида гапириб берди.

Коллаж: «Tez News»

Актриса ўзининг иккинчи мутахассислиги конструктор-дизайнер экани, маълум муддат Танзила Норбоеванинг шахсий дизайнери сифатида ишлагани, шунингдек, илк фаолиятида унга йўл-йўриқ кўрсатган инсон Танзила Камаловна бўлгани ҳақида айтиб ўтган.

«Биринчидан, менинг устозим. Уларни жудаям ҳурмат қиламан. Жудаям яхши кўраман. Бир неча йил шахсий дизайнери бўлганман. Ательедан кетганимдан кейин, афсуски, Танзила опага ҳеч нарса қилиб бера олмадим. Бунинг учун ҳалиям ўзимни кечира олмаяпман. Чунки яқинда кўришганимизда ‘Раъно, янаям чиройли кўйлаклар, костюмлар қилиб берсанг бўларканʼ, деб илтимос қилдилар, кейин мен Туркияга кетиб қолдим, қилиб бера олмадим, кечирим сўрайман», — деди актриса.

«Улар — бошқача инсонлар. Мен кўп йиллар давомида хайрия йўналишида ишлаганман. Ўзимнинг хайрия фондим бор эди. Кар-соқовлар билан ишлар эдим. Ўшанда биринчи бўлиб менга йўл-йўриқ кўрсатган инсон Танзила Камаловна бўлганлар. Уларнинг маслаҳатлари билан йўналишимда катта поғоналарга чиқдим. Уларнинг танбеҳлари билан, уларнинг маслаҳатлари билан… Нафақат маслаҳатлар, ҳаттоки моддий ёрдамлар ҳам берганлар менга», — дейди Раъно Шодиева.

Шунингдек, актриса ўзининг шоурумини очмоқчи экани, аммо бу ҳақда ҳали ҳеч кимга айтмаганини маълум қилди. «Бу ўзимнинг стилим бўлади, ҳеч қанақа янгилик қилмайман. Қаердандир олмайман. Кийимлар нархи бу ерга келган ўзбек аёлининг маоши кўтара оладиган даражада бўлади», — дейди у.