Байден АҚШ учун пандемиянинг оғир даври келаётганини маълум қилди
АҚШнинг янги сайланган президенти Жо Байден Делавэр штатидаги Уилмингтон шаҳрида бўлиб ўтган матбуот анжумани чоғида Қўшма Штатларда коронавирус пандемиясига қарши курашнинг қийин даври келаётганини айтиб ўтди. Бу ҳақда «ТАСС» хабар берди.
Фото: Getty Images
Президентнинг таъкидлашича, Қўшма Штатларда аҳолини эмлаш бошланганига қарамай, вируснинг юқиши ва ўлим ҳолатлари давом этаверади. «Оддий ҳақиқат шундаки, COVID-19’га қарши курашда энг оғир кунлар ҳали олдинда», — дейди у.
Шунингдек, демократ инқирозга қарши курашда бир сонияни ҳам йўқотмаслик кераклигини қўшимча қилган. Байденнинг сўзларига кўра, унинг маъмурияти 20 январда бўлиб ўтадиган инаугурациядан кейинги биринчи кундан ўз вазифаларини бажаришга киришади.
Маълумот учун, инаугурация — қасамёд қилиш ва президентликка киришиш жараёни. Бундай инаугурация, одатда, расмий маросим ёки махсус тадбир орқали амалга оширилади.
Айни пайтда АҚШ дунё мамлакатлари орасида коронавирус энг кўп тарқалган давлат бўлиб турибди. Вирус қайд этилганлар 23 декабрь Тошкент вақти билан соат 10:30 ҳолатига кўра, 18 684 628 кишини ташкил этмоқда. Ўлимлар сони 330 824 тага етган. Касалликдан ҳозиргача 10 945 09 киши фориғ бўлган. 7 408 707 нафар аҳоли вирусга қарши даволанмоқда.
Аввалроқ АҚШ коронавирусга қарши «Pfizer» вакцинасидан фавқулодда фойдаланишга рухсат бергани ҳақида хабар берилган эди. Аммо вакцина билан эмланган шифокорларнинг аҳволи ёмонлашган. Эмлашдан кейин 10 дақиқа ўтиб, ўрта ёшли аёлда анафилактик реакция бошланган: нафаси қисиб, тошма тошган ва пульс тезлашган. Аёлга осма укол қўйишган, аммо уни олиб ташлагандан кейин симптомлар қайта такрорланган.
