Ерда музларнинг эриши сўнгги 30 йилда қанчага тезлашгани маълум бўлди

Британиялик тадқиқот гуруҳи сайёрадаги музларнинг эриш даражаси 1994–2017 йилларда 65 фоизга ошганлигини аниқлади. Бу ҳақда 25 январь, душанба куни «SciTechDaily» хабар берди.

Фото: «theglobeandmail»

Шундай қилиб, 23 йил ичида Ерда 28 триллион тонна муз эриб кетган. Бу Буюк Британиянинг катталиги 100 метр қалинликдаги муз қатламига тенгдир. Эриш даражаси 1994 йилда йилига 0,8 триллион тонна бўлган бўлса, 2017 йилда бу даража 1,3 триллион тоннага кўтарилган. Йўқотишларнинг аксарияти Антарктида ва Гренландияда муз қатламларининг эриши натижасида юзага келган.

Таъкидланишича, музларнинг эриши денгиз сатҳи даражасини кўтаради ва қирғоқ бўйидаги шаҳарлар ва экотизим учун хавф туғдиради. Тадқиқот муаллифлари бутун сайёра бўйлаб музларнинг эриши атмосферадаги ҳарорат кўтарилиши (68 фоиз) ва океан сувлари ҳароратининг ошиши (32 фоиз) туфайли содир бўлганлигини таъкидлади.

Аввалроқ инсоният тарихида 2020 йил энг иссиқ йил деб топилгани ҳақида хабар берилган эди. БМТ Ўзбекистонга иқлим ўзгаришларига қарши курашиш учун қанча маблағ ажратгани маълум бўлган.

Янгиликлар