Қорақалпоғистонда «Howo» ва «Nexia» тўқнашиши оқибатида 5 киши вафот этди — видeo

Қорақалпоғистоннинг Беруний туманида 21 январь куни «Nexia» ва «Howo» юк машинаси тўқнашиши оқибатида беш киши ҳалок бўлди. Бу ҳақда «Yoshlar» телеканалининг «Yangi davr» информацион дастурида хабар қилинди.

Кадр: YouTube

Маълум қилинишича, воқеа соат 15:25 атрофида Беруний тумани Ғузор—Бухоро—Нукус—Бейнеу автомагистралининг 651-километрида содир бўлган. 32 ёшли фуқаро бошқарувидаги «Nexia» Беруний тумани томон ҳаракатланиб келаётган «Howo» юк машинаси билан тўқнашиб кетган.

Содир бўлган тўқнашув оқибатида «Nexia» ҳайдовчиси ва йўловчилардан бири воқеа жойида ҳалок бўлган. Шунингдек, «Nexia» салонида бўлган бошқа йўловчилар туман тиббиёт бирлашмаси жонлантириш бўлимига олиб келинган, бироқ кўрсатилган тез тиббий ёрдам қарамай, улар вафот этган.

Хабарда катта тезликда ҳаракатланган «Nexia» қарама-қарши йўналишда ҳаракатланиб келаётган «Howo» юк машинасининг қаршисига чиқиб кетгани таъкидланган. Ҳодиса сабаблари ўрганилганида ҳалокат қор ёғгани сабабли йўлларнинг сирпанчиқ ҳолга келиб қолгани оқибатида юзага келгани аниқланган.

Аввалроқ Оҳангаронда «Зил» ёниб кетгани ва Тошкентда музлама сабаб 6 та автомобиль иштирокида «авария» бўлгани хабар қилинган. Шунингдек, Сергелида «Nexia» кескин тўхташи оқибатида 3 та автомобиль тўқнашиб кетгани маълум қилинган.