Қашқадарёда 1,1 млрд сўмлик газ конденсатини ўғирлаган жиноий гуруҳ қўлга олинди

Қашқадарё вилояти Нишон туманида газ конденсатини ўғирлаш билан шуғулланган жиноий гуруҳ фаолиятига чек қўйилди.

Маълум қилинишича, 25 январь куни ўтказилган тезкор тадбирда беш нафар фуқаро ўзаро жиноий гуруҳ ташкил қилиб, Нишон тумани “Ширинобод” маҳалласи ҳудудидан кесиб ўтувчи Epsilon Development cоmpany МЧЖ шаклидаги хорижий корхонага тегишли газ конденсати қувурини тешиб, жўмрак ўрнатиш орқали қиймати 17,4 миллион сўмлик 8,9 тонна конденсат ёқилғисини ўғирлаб чиққан вақтда далилий ашёлар билан ушланган.

Олиб борилган текширув ҳаракатлари давомида мазкур жиноий гуруҳ томонидан жами 1,1 миллиард сўмлик 568,5 тонна газ конденсати ёқилғиси талон-торож қилингани аниқланган.

Мазкур ҳолат юзасидан Қарши ихтисослаштирилган прокуратураси томонидан Жиноят кодексининг 169-моддаси (ўғирлик) 4-қисми “а” банди билан жиноят иши қўзғатилиб, 5 нафар шахс процессуал тартибда ушланган.

Ҳозирда дастлабки тергов ҳаракатлари олиб борилмоқда.