Туркияда кучли зилзила юз берди: 20 га яқин киши жароҳат олди
27-октабр куни кечқурун Туркия ғарбида 6,1 магнитудали зилзила содир бўлди. Бу ҳақда мамлакат табиий офатларни бошқариш бошқармаси матбуот хизмати хабар берди.
Силкинишларнинг эпицентри Балиқэсир вилоятининг Синдирги шаҳри атрофида, тахминан 7 километр чуқурликда жойлашган.
Зилзила мамлакатнинг кўплаб ҳудудларида, жумладан, Истанбул, Измир ва Бурса шаҳарларида ҳам сезилган. Қайд этилишича, айрим аҳоли пунктларида бинолар қисман вайрон бўлган ва инфратузилма объектларига зарар етган.
Туркия Ички ишлар вазирлигининг дастлабки маълумотларига кўра, ҳалок бўлганлар йўқ, бироқ камида 20 киши тан жароҳати олган.
Ҳодиса жойига Фавқулодда ҳолатлар бошқармаси (AFAD)нинг бўлинмалари йўналтирилган. Эпицентр атрофида зарарни баҳолаш ишлари олиб борилмоқда, уйларини тарк этган фуқаролар учун вақтинчалик жойлаштириш пунктлари ташкил этилган.
