Депутат дарахтларни кесишига қўйилган чекловни бекор қилиш таклифига қаршилик билдирди

Тадбиркор Мурод Назаров Тошкентда дарахтлар кесилишига қарши мораторийни олиб ташлашни таклиф қилгани юзасидан Экопартия аъзоси депутат Жавлон Абдуллаев муносабат билдирди.

17 июль куни Тошкентда ўтказилган қурилиш соҳасига оид йиғилишда тадбиркор Мурод Назаров пойтахтда қурилиш ишлари давомида дарахтларни кесишга жорий этилган чекловни бекор қилиш кераклиги ҳақида таклиф билдирди. Унга кўра, реконструкция ва янги қурилиш ишлари кўп ҳолларда дарахтларга тўғри келиб қолади ва бу ҳолат техник жараёнларга халақит беради. Назаров бундай чекловлар коррупцияга йўл очиши мумкинлигини таъкидлаган.

Тадбиркор бунинг ўрнига «дарахтлар банки» тизимини жорий қилишни таклиф қилди. Унга кўра, ҳар бир қурувчи компания олдиндан янги дарахтлар экиб, керак бўлса, уларни учинчи шахсдан харид қилиб, кейинчалик ҳокимият балансига топширади.

Мазкур фикрга Экопартия аъзоси, депутат Жавлон Абдуллаев эътироз билдирди. У дарахтларни муҳофаза қилишга оид мораторий бежиз жорий этилмаганини, бу чора туфайли 2025 йилнинг биринчи ярмида 453 мингдан ортиқ асраб қолинганини эслатди. Депутат фикрича, ҳар бир дарахт кислород ишлаб чиқаришда, шовқинни камайтиришда, ҳавони тозалашда ва тупроқ эрозиясининг олдини олишда муҳим роль ўйнайди.

Шунингдек, «қайта экиш» номи билан кўчирилган ёки янгидан экилган кўчатларнинг аксарияти қуриб қолаётгани таъкидланди. Депутатнинг фикрича, дарахтни ўрнини бошқа ҳудудда экиш орқали қоплаш экологик жиноят билан тенг бўлиши мумкин.

Экопартия бу каби таклифларга мутлақо қарши эканини билдирган ҳолда, реновация лойиҳаларида муҳофаза қилинаётган дарахт ва буталарни қонуний жиҳатдан мустаҳкамлаш ташаббуси билан чиқишини маълум қилди.

Маълумот учун, 500 минг дарахт йилига 50–60 минг тонна кислород ишлаб чиқаради. Бу 70–80 минг кишининг йиллик нафас олиши учун етарли.

Ўзбекистон бўйича 2025 йилнинг ўтган даврида 848 туп дарахт ноқонуний кесилган ва ҳар бир ҳолат бўйича қонунчиликка мувофиқ жазо чораси кўрилган.