Cаратонга қарши иммунитетни фаоллаштирувчи вакцина ишлаб чиқилди
Олимлар Covid-19 вакцинасига ўхшаш тарзда ишлайдиган, mRNK технологияси асосида cаратонга қарши универсал вакцина ишлаб чиққанини маълум қилмоқда. Бу ҳақда New Atlas нашри хабар берди.
Флорида университети олимлари иммунитет тизимини кучайтириш орқали саратон касаллигига қарши курашишга ёрдам берадиган экспериментал mRNK вакцинасини ишлаб чиқди. Ушбу вакцина кимётерапия, нур терапияси ёки жарроҳлик аралашуви каби мураккаб муолажаларни қисқартириши мумкин. Вакцина иммун ҳужайраларга саратон ҳужайраларига қарши биргаликда курашишни «буюради».
Тадқиқот муаллифларидан бири Дуэйн Митчеллнинг таъкидлашича, вакцина саратонни тўғридан-тўғри даволашга эмас, балки организм иммун жавобини кучайтиришга қаратилган:
Шундай ёндашув билан саратонга қарши кучли иммун реакцияни фаоллаштириш мумкин. Бу эса препаратнинг кенг қўлланиши учун катта салоҳиятга эга эканини кўрсатмоқда.
Вакцина сичқонлар устида синовдан ўтказилган. Синовлар натижасида, препарат кенг қўлланиладиган PD-1 ингибитори билан биргаликда меланома (тери саратони)га қарши юқори самарадорлик кўрсатган. Мия, суяк ва тери саратонининг бошқа шаклларига қарши эса вакцина алоҳида ҳолатда ҳам натижа берган.
Ҳозирда вакцина клиник олди босқичида бўлиб, тадқиқотчилар яқин вақт ичида уни инсонлар устида клиник синовдан ўтказишга тайёргарлик кўрмоқда.
