Буюк Британия Россиянинг эҳтимолий ҳужумига қарши мудофаа режаси устида ишламоқда
Буюк Британия ҳукумати Россия томонидан бўлиши мумкин бўлган ҳарбий таҳдидларга қарши тайёргарликни кучайтирмоқда. Бу ҳақда «The Telegraph» нашри хабар берди.
Хабарга кўра, сўнгги марта 2005 йилда таҳрирланган ҳужжат ҳозирги замонавий хавфларга, жумладан, киберуруш ва ракета ҳужумларига қарши чора-тадбирларни ўз ичига олади.
Қайд қилинишича, режада уруш эълон қилингач, ҳукуматнинг ҳаракатлар тартиби, фуқаролик инфратузилмасини – темирйўллар, алоқа тармоқлари, флоти – ҳимоя қилиш усуллари, қироллик оиласи ва вазирларнинг хавфсиз ҳудудларга кўчирилиш тартиби, ОАВ орқали аҳолига ахборот етказиш ва ресурсларни сафарбар этиш механизмлари баён этилиши кўзда тутилган.
Шунингдек, ҳужжатда Буюк Британияга оддий ёки ядровий қуроллар билан ҳужум қилиниши мумкин бўлган бир нечта сценарийлар ҳам ишлаб чиқилмоқда.
Режа оммага эълон қилинмаслиги мумкин, бироқ у урушга тайёргарликда муҳим босқич ҳисобланади.
