Ўзбекистонда электрон сигареталарни ўтказганлик учун жавобгарлик белгиланди

Ўзбекистонда электрон сигареталар тарқатиш учун жавобгарлик белгиланди. Бу ҳақда Адлия вазирлиги тегишли қонунга таяниб хабар бермоқда.

Қонун билан Жиноят кодексига киритилган ўзгартиришларга кўра, Ўзбекистонда муомаласи тақиқланган тамаки маҳсулотлари, никотин етказиб беришнинг электрон тизимлари, шу жумладан электрон сигареталарни тайёрлаш, олиш, сақлаш, ташиш ўтказиш, ишлаб чиқариш Ўзбекистонга олиб кириш ёки ундан олиб чиқиш учун жавобгарлик белгиланди.

Хусусан, анча миқдорда ёхуд шундай ҳаракатлар учун маъмурий жазо қўлланилганидан кейин содир этилган бўлса:

• БҲМнинг 300 бараваридан 500 бараваригача миқдорда жарима ёки 2 йилдан 3 йилгача ахлоқ тузатиш ишлари ёки 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади.

Бунда ушбу ҳаракатларни содир этган шахс айбини бўйнига олиш тўғрисида ҳокимият органларига арз қилган ва муомаласи тақиқланган маҳсулотларни топширган тақдирда, жавобгарликдан озод қилинади.

Бундан ташқари «Алкоголь ва тамаки маҳсулотларининг тарқатилишини ҳамда истеъмол қилинишини чеклаш тўғрисида»ги Қонунда электрон сигареталар ва улар учун суюқликларнинг айланишига доир тақиқ белгиланди.

Қонун расмий эълон қилинган кундан 3 ой ўтгач кучга киради.

Эслатиб ўтамиз, электрон сигаретларни тақиқлаш вейпларга таъсир қилади, лекин иситиладиган тамаки маҳсулотларига таъсир қилмайди. Бу ҳақда 7 январ куни Олий Мажлис Қонунчилик палатасининг мажлисида соғлиқни сақлаш вазири Асилбек Худаяров маълум қилган эди.

Таҳлил натижаларигa кўра, даромади юқори бўлган фойдаланувчилар зажигалкаларга муқобил сифатида тамакини қиздириш тизимларини кўпроқ афзал кўришади. Биринчи босқичда бу қурилмаларга таъқиқ жорий этилмайди. Бироқ ёшлар орасида оммалашган никотинли хушбўй (ароматли) вейплар қатъий чекланади, — деди у.