Гибрид автомобилларни экологик сертификатлаш бўйича сенатор сўрови юборилди
Гибрид автомобилларни экологик сертификатлаш тартиби юзасидан сенатор сўрови юборилди. Бу ҳақида Сенат матбуот хизмати хабар берди.
Хабарга кўра, сўнгги кунларда Ўзбекистонга олиб кирилаётган гибрид автомобилларни божхонада расмийлаштиришда “Евро-4” экологик тоифасидан паст бўлмаслигига доир экологик сертификат талаб қилинаётгани жамоатчилик орасида муҳокамаларга сабаб бўлмоқда.
Мазкур масала юзасидан юборилган сўровда қуйидаги масалаларга аниқлик киритилиши сўралган:
• автомобилларни экологик стандартдан ўтказувчи аккредитациядан ўтган синов лабораториялари, уларнинг моддий-техник базаси, автомобилларни синовдан ўтказиш қамрови ва имкониятлари;
• электродвигателлар билан жиҳозланган гибрид автомобилларни расмийлаштириш жараёнида экологик сертификат олиш тўғрисидаги талабнинг меъёрий-ҳуқуқий асослари;
• аризани кўриб чиқиш, экологик сертификатлаш жараёнини амалга ошириш ва экологик сертификат бериш ёки уни беришни рад этиш юзасидан ишлар қиймати бўйича белгиланган тўлов миқдори.
Қайд қилинишича, сенатор сўрови орқали мавжуд тартибнинг таъминланиши, жорий этилган амалий механизмларда шаффофликка эришиш ҳамда тадбиркорлар ва фуқароларнинг ортиқча қийинчиликларга ва оворагарчиликка дуч келмаслиги мақсади назарда тутилган.
Ҳозирда электромобиль сифатида божхонадан ўтказилаётган Lixiang, Leapmotor, Voyah, Deepal каби гибрид автомобиллардан ҳам “Евро-4” сертификати талаб қилинмоқда. Бироқ мутахассисларнинг таъкидлашича, бундай автомобиллар асосан “Евро-5” ва “Евро-6” стандартларига мос келади.
Бундан ташқари, Ўзбекистонда автомобилнинг экологик даражасини аниқловчи ускуналар йўқлиги сабабли, экологик сертификатлар ишлаб чиқарувчи тақдим этган ҳужжатлар асосида берилади. Шу билан бирга, экологик сертификатлар ҳар бир автомобиль учун алоҳида олиниши ва бу харажат 2 миллион сўмдан ортиқ бўлиши айтилган.
