Шавкат Мирзиёев тарбияни ривожлантирмай туриб, натижага эришиб бўлмаслигини таъкидлади
Президент Шавкат Мирзиёев Кўксарой қароргоҳида 31 август, душанба куни мамлакат мустақиллигининг йигирма тўққиз йиллигига бағишланган байрам тадбирида тарбияни ривожлантирмай, натижага эришиб бўлмаслигини таъкидлади.
«Aгар биз илмимиз билан, иқтисодиётимиз билан, математика, физика, кимё билан бир қаторда тарбияни ҳам ривожлантирмас эканмиз, натижага эришолмаймиз. Шунинг учун биринчи марта тарбия фанини жорий этмоқдамиз», — дейди Шавкат Мирзиёев.
Эслатиб ўтамиз, Кўксарой қароргоҳида 31 август куни Ўзбекистон Мустақиллигининг йигирма тўққиз йиллигига бағишланган байрам тадбири бўлиб ўтгани ҳақида хабар берилган эди. Байрам тадбирида Шавкат Мирзиёев Ўзбекистонда учинчи Ренессанс даврига пойдевор яратилаётгани ҳақида таъкидлади. Шунингдек, Шавкат Мирзиёев Шаҳидлар хотираси хиёбонига ташриф буюргани ва Мустақиллик ва эзгулик монументи пойига гулчамбар қўйгани маълум қилинди.
Ўзбекистонда 2020 йил «Ҳар бир оила — тадбиркор» дастурини амалга ошириш учун 4 триллион сўмдан зиёд маблағ йўналтирилиши маълум бўлди.
Ундан ташқари Президент Ўзбекистоннинг халқаро валюта захиралари ҳажми 34 миллиард долларга етгани маълум қилган ва коронавирусга қарши курашда ёрдам берган Хитой, Россия, AҚШ ва бошқа давлатларга миннатдорчилик билдирган.
