«‘Карвон’дан олдин танишганмиз». Хонанда Санжай рафиқаси билан қандай танишгани ҳақида гапирди
Хонанда Санжай «Aldama meni» кўрсатувида иштирок этиб, ўзининг ҳаёти ва рафиқаси билан қандай танишгани ҳақида гапирди.
Фото: Instagram / @alisha_az_
Санжай интервью давомида рафиқаси ундан 15 ёш кичкина эканлиги, Instagram орқали танишгани ва унинг миллати ўзбек эмаслиги ҳақида гапирган.
«Рафиқам мендан 15 ёш кичкина. ‘Карвонʼ қўшиғи чиқишидан олдин танишганмиз. ‘Карвон’дан кейин эмас, олдин. Бу пайти Ўзбекистонда мени унчалик танишмасди. Instagram’да ўртоғимнинг профилида обуначилари орасида кўриб қолганман. Шундан сўнг ‘Ким бу қиз?ʼ деб сўраганман. Суратларига роса лайк қўйганман.
У эса видеоларим орасидаги бир постга кириб, ‘Зўр қўшиқ экан, тўлиқ ҳолда қаердан олса бўлади?ʼ деб ёзди. Шундай қилиб танишиб қолганмиз. Секин-секин салом-алик бошланди. Бир кун ‘Келинг, бирор жойда кўришамизʼ, деб, кафеда кўришдик.
Исмлари — Алиша. Ўзбек эмас. Ер юзида, биринча навбатда, одам одам бўлиши керак. Миллатлар кейинчалик пайдо бўлган тушунча. Келишишимиз яхши, одатда рус тилида гаплашамиз. Менинг ота-онам билан ўзбекча гаплашади», — дейди Санжай.
Эслатиб ўтамиз, xонанда Санжай бир қанча қўшиқ ва шеърларни муаллифларнинг розилигисиз ижро этгани сабабли унинг «иши» судга оширилгани хабар қилинганди. Шундан сўнг хонанда Зоҳиршоҳ Жўраев YouTube’даги «Salom Live» кўрсатувига берган интервьюсида Санжайга нисбатан муносабати ҳақида гапирганди.
Шоҳжаҳон Жўраев 4 декабрь куни ўзининг Instagram’даги саҳифасида журналист Феруза Фаттоҳова томонидан эълон қилинган постни жойлаган. Унда таъкидланишича, Жўраевлар оиласи Санжай томонидан қўшиқларнинг кавер қилинишига эмас, «Карвон» қўшиғига ишланган клипда Шерали Жўраевнинг сурати деворга чизиб кўрсатилганига эътироз билдирган.
