Наманганда 15 300 долларлик маиший техника буюмларини сотиб юборган сохта дилер қўлга олинди

Наманган шаҳрида фирибгарлик йўли билан 15 300 долларлик маиший техника буюмларини олиб, бошқа шахсларга ўзининг шахсий манфаатлари йўлида сотиб юборган «дилер»га жиноят иши қўзғатилди. Бу ҳақда Наманган вилояти Ички ишлар бошқармаси ахборот хизмати хабар берди.

Маълум бўлишича, Наманган шаҳрида яшовчи фуқаро 14 август куни ўзига тегишли бўлган савдо дўконига 2019 йил октябрь ойида бир таниши келиб «Мен ‘Samsung’ уяли алоқа компанияси дилериман, насияга маҳсулот бериб турсангиз, уларни Андижон ва Фарғона вилоятларидаги харидорларимга сотиб, пулларингизни 2 ой муддат ичида тўлиқ бераман», деб алдаб, 2019 йилнинг октябрь ойидан 2020 йилнинг февраль ойига қадар ундан жами 15 300 АҚШ долларлик маиший техника буюмларини олган. Бироқ ушбу буюмларни бошқа шахсларга сотиб юбориб, пулларни ўзининг шахсий манфаатлари йўлида сарфлаб юборган.

Савдо дўкони эгаси ушбу ҳолат бўйича Наманган шаҳар Ички ишлар органлари фаолиятини мувофиқлаштириш бошқармаси (ИИО ФМБ )га ариза билан мурожаат қилган ва чора кўришни сўраган. Ҳозирда ушбу ҳолат бўйича шаҳар ИИО ФМБ Тергов бўлими томонидан Жиноят кодексининг 168-моддаси (Фирибгарлик) 3-қисми билан жиноят иши қўзғатилган.

Хабарда таъкидланишича, тергов-суриштирув ишлари натижасида фирибгарликда айбланаётган шахс муқаддам Жиноят кодексининг 168-моддаси 2-қисми билан судлангани ҳам маълум бўлган.

Аввалроқ Самарқандда дўкондан бир миллион сўмлик мулкни ўғирлаган шахс ушлангани, Бухорода машина олиб беришини айтиб, фуқарони 35 миллион сўмга чув туширган шахс ҳамда Олтиариқда танишига 10 000 доллар эвазига катта миқдорда кредит олиб бермоқчи бўлган шахс қўлга олингани ҳақида хабар берилганди.

Шунингдек, Марғилонда танишининг 1 миллион сўмлик телефонини фойдаланишга олиб, сотиб юборган фуқаро қўлга олингани, Қўқонда танишининг 1,5 миллион сўмлик телефонини фойдаланиш учун олиб, сотиб юборган шахсга ва Қўқонда танишига автомашина олиб беришни ваъда қилиб, уни 500 доллар ва 10 миллион сўмга «ухлатган» шахсга жиноят иши қўзғатилгани маълум қилинганди.