Иш вақтидан ташқари меҳнатга ҳақ тўлаш тартиби ўзгариши мумкин
27 май куни иш вақтидан ташқари ишлаганлик учун ҳақ тўлаш ва иш давомийлигини соддалаштиришга доир қонун лойиҳаси биринчи ўқишда қабул қилинди. Бу ҳақда Олий Мажлис Қонунчилик палатаси хабар берди.
Қонун лойиҳасига кўра, иш вақтидан ташқари меҳнатнинг биринчи икки соати учун камида 1,5 баравар, ундан ортиқ соатлар учун эса камида 2 баравар миқдорда ҳақ тўлаш белгиланмоқда. Амалдаги тартибда эса бундай иш учун доимий равишда камида 2 баравар миқдорда ҳақ тўланади.
Бундан ташқари, Меҳнат кодексининг 190-моддасига ўзгартириш киритилиб, ходимлар учун белгиланган йиллик 120 соатлик иш вақтидан ташқари иш чеклови бекор қилиниши таклиф этилмоқда. Шу билан бирга, кунлик чекловлар сақланиб қолади.
Бандлик вазири ўринбосари Раъно Турдибоеванинг таъкидлашича, қонун лойиҳаси тадбиркорларнинг таклифлари асосида ишлаб чиқилган. Тадбиркорлар йиллик чекловларни бекор қилиш ва 40 соатдан ортиқ ишлаганлик учун 1,5 баравар ҳақ тўлашни таклиф қилган.
2024 йилда иш вақтидан ташқари меҳнатга норасмий жалб қилиш билан боғлиқ 627 та ҳолат аниқлангани қайд этилди. Янги тартиб бу каби қонунбузарликларнинг олдини олишга хизмат қилиши кутилмоқда.
Қонун лойиҳасини ишлаб чиқишда 68 та мамлакат тажрибаси ўрганилган. Маълумотларга кўра, Германия, Нидерландия, Испания ва Швеция каби давлатларда иш вақтидан ташқари иш учун 1,25–1,5 баравар ҳақ тўланади, йиллик чеклов эса мавжуд эмас. Халқаро Меҳнат Ташкилоти конвенцияларида ҳам йиллик чекловлар кўзда тутилмаган.
