Ўзбекистонда тўлов хизматларидаги пул ўтказмалари устидан назорат кучайтирилади
Ўзбекистондаги тўлов хизматлари айрим турдаги операциялар устидан назоратни кучайтириши шарт бўлади. Бу мамлакатда ноқонуний даромадларни легаллаштиришга қарши курашиш бўйича ички назорат қоидаларига киритилган ўзгартишларда белгилаб қўйилган.
Янги тартибларга кўра, тўлов ташкилотлари мобил иловаларда фуқаролар томонидан янги аккаунтлар очилганда мижозни текшириш чораларини кўриши лозим. Шунингдек, товар ва хизматлар етказиб берувчилар электрон тўлов терминаллари олишдан олдин текширувдан ўтади.
Агар пул ўтказмаси 30 баравар базавий ҳисоблаш миқдоридан (яъни 11,2 миллион сўмдан) ошса ёки 500 БҲМ (187,5 миллион сўм) миқдоридаги операциялар ҳисоб очмасдан амалга оширилса, жўнатувчи ва қабул қилувчини мажбурий текшириш жорий қилинади.
Ички пул ўтказмалари 30 БҲМдан ошган ҳолларда тўлов хизмати тизими ҳисоб рақами ёки операция рақами, шунингдек, жўнатувчи ва олувчининг шахсий маълумотларини кўрсатиши шарт.
Агар банк аллақачон жўнатувчи ҳақида маълумотга эга бўлса, фақатгина ПИНФЛ, ҳисоб рақами ёки операция идентификаторини кўрсатиш кифоя. 30 БҲМгача бўлган ўтказмаларда эса жўнатувчи ва олувчининг исми етарли бўлади.
Бундан ташқари, тўлов хизматлари ва тўлов тизимлари операторлари ноқонуний фаолиятни молиялаштиришда гумон қилинган шахслар ҳақида мавжуд маълумотларга мижозлар маълумотлари қанчалик мос келишини аниқлаш даражасини белгилаши лозим.
