Президент 28 та туманнни камбағаллик ва ишсизликдан чиқаришни топширди

Шавкат Мирзиёев маҳалла тизимидаги ислоҳотларни янги босқичга кўтариш ва жойларда иш самарадорлигини ошириш масалаларига бағишланган йиғилиш ўтказди.

Маҳаллаларга маблағ ажратилиб, шароит яратилгани учун шу йилнинг ўзида 237 минг оила камбағалликдан чиқарилгани таъкидланди. Лекин ҳозирда 28 та кичик туманда ишсизликка қарши етарли чора кўрилмаётгани қайд этилди.

Маҳалла тизими учун масъул раҳбарларга бугунданоқ ишчи гуруҳи тузиш ва ушбу 28 та туманга бориб, улардаги ишсизлик, камбағаллик ва жиноятчиликни келаси йили 2 карра қисқартириш бўйича чора-тадбирларни ишлаб чиқиш топширилди, – дейилади хабарда.

Қайд этилганидек, маҳаллаларга 2 минг квадрат метргача бўш давлат объектларини аукционга чиқариш ваколати берилган. Масалан, Самарқанд шаҳар Шодлик маҳалласи 1,5 минг квадратли бино сотувидан маҳалла бюджетига 5 миллиард сўм туширган.

Кўряпсизларми, қолган маҳаллаларда ҳам «еттилик» изланса, 3 мингга яқин бундай биноларни сотиш орқали анча масалани ҳал қилса бўлади, – деди Президент.

Шунингдек, эндиликда маҳалла раиси ва ҳоким ёрдамчиси бўш турган 5 минг квадратгача бўлган давлат мулкини аукционга чиқариши мумкин бўлиши хабар қилинди.

Шу билан бирга, сотувдан тушган маблағнинг 70 фоизи маҳалланинг ўзида қолиши ва инфратузилмага сарфланиши билдирилди.